පාසල්වල අධ්‍යාපන කටයුතු සඳහා භාවිත කරන WhatsApp, Viber සහ Telegram වැනි සමාජ මාධ්‍ය වේදිකා පාසල් බලධාරීන් විසින් අඛණ්ඩව අධීක්ෂණය කළ යුතු බවට අධ්‍යාපන අමාත්‍යාංශය විසින් චක්‍රලේඛයක් නිකුත් කර තිබෙනවා.
අධ්‍යාපන අමාත්‍යාංශයේ ලේකම් ජේ.එම් තිලකා ජයසුන්දර විසින් සියලුම පාසල් විදුහල්පතිවරුන්ට සහ අධ්‍යාපන බලධාරීන්ට එම චක්‍රලේඛය නිකුත් කර ඇති බව සඳහන්.
COVID -19 වසංගතය තුළ සිසුන්ට මඟ හැරුණු ඉගෙනුම් අවස්ථා නැවත ලබා ගැනීමට උපකාර කිරීම සඳහා WhatsApp, Viber සහ Telegram වැනි සමාජ මාධ්‍ය වේදිකා මුලින් හඳුන්වා දුන්නත් මෙම මෙවලම් අදටත් සිසුන් විසින් බහුලව භාවිතා කරනු ලබන බවයි අමාත්‍යාංශය පවසන්නේ.
පාසල්වල සමාජ මාධ්‍යවල අයහපත් බලපෑම් පිළිබඳව අමාත්‍යාංශයට වාර්තා ලැබී ඇති බවත්, මෙම වේදිකා නිසා ඇතිවන ඕනෑම හානියක් හෝ කීර්තිනාම හානියක් සඳහා පරිපාලකයින් වගකිව යුතු බවත් එහි සඳහන් වනවා.
මේ නිසා මෙම චක්‍රලේඛය නිකුත් කිරීමට අමාත්‍යාංශය පොළඹවා ඇති බවයි අධ්‍යාපන අමාත්‍යාංශයේ ලේකම් සඳහන් කර ඇත්තේ.
