සඳට ගිහින් , අදට වසර 55ක්..

මිනිසා පළමු වරට සඳ මත පා තැබූ ඓතිහාසික දිනය සනිටුහන් වී අදට (20) දිනයට වසර 55ක් සපිරෙනු ඇති.

මිනිසෙකුගේ එක් කුඩා පියවරක්, මුළු මහත් මනුෂ්‍ය වර්ගයාගේ අනාගතය වෙනුවෙන් වූ යෝධ පිම්මක් යන ඉතිහාසගත ඒ වඳන් පෙළ ලෝ ප්‍රකට අභ්‍යවකාශගාමි නීල් ආම්ස්ට්‍රෝන්ග් විසින් ප්‍රකාශ කළේ 1969 වසරේ ජුලි 20වනදාවකයි.

මිනිසා පළමුවරට සඳ මත පා තැබූ එම මොහොත සජීවීව නැරඹීමට ලෝකවාසීන්ට එදා අවස්ථාව උදාවුණා.

ලෝක ඉතිහාසයේ එදා මෙදා තුර අතිශයින් ජනප්‍රිය ගගනගාමීන් තිදෙනා වන නීල් ආම්ස්ට්‍රෝන්ග්, එඩ්වින් ඕල්ඩ්රින් සහ මයිකල් කොලින්ස් රැගත් ඇපලෝ 11 යානය සඳ ගමන ආරම්භ කලේ 1969 වසරේ ජුලි 16වනදායි.

සැටන් වී රොකට් යානය ආධාරයෙන් මෙම සුවිශේෂී යානය අභ්‍යවකාශගත කරනු ලැබුවේ, ෆ්ලොරීඩා ප්‍රාන්තයේ පිහිටි කෙනඩි අභ්‍යවකාශ මධ්‍යස්ථානයෙන්,

එසේම, 1969 වසරේ ජුලි 20 වනදා ශ්‍රී ලංකා වේලාවෙන් අලුයම 1.50ට පමණ නීල් ආම්ස්ට්‍රෝන්ග් සහ එඩ්වින් ඕල්ඩ්රින් රැගත් ඇපලෝ 11 සඳ මත ගොඩබස්සවනු ලැබුවා.

ඉන් පැය 6කට පසු සඳ මත පා තැබූ ප්‍රථම මිනිසා වීමේ භාග්‍යය උදා කරගැනීමට නීල් ආම්ස්ට්‍රෝන්ග් සමත්වුණා.