කොළොන්න උල්ලිඳුවාව අප්ටන්වත්තේදී ඉඩම් හිමි වැවිලිකරුවකු වන එච්. කුමාරසේන (61) නමැති අයට ඔහුගේ නිවෙසට පැමිණ වෙඩි තබා ඝාතනය කර පලාගිය වෙඩික්කරුවන් දෙදෙනා පොලිස් විශේෂ කාර්ය බළකාය විසින් පෙරේදා (11) මිද්දෙණියේදී අත්අඩංගුවට ගෙන ඇත.
විදෙස්ගතව සිටින පාතාලයේ අපරාධකරුවකු වන රොටුඹ
අමිල දුන් රුපියල් ලක්ෂ 20ක කොන්ත්‍රාත්තුවකට අනුව මේ ඝාතනය සිදු කළ
බව අත්අඩංගුවට ගත් වෙඩික්කරුවන් දෙදෙනා පවසන බව පොලිස් විශේෂ කාර්ය
බළකාය සඳහන් කළේය.
එහෙත් මොවුන් දෙදෙනාට ලැබී ඇත්තේ රුපියල් ලක්ෂ 2ක
මුදලක් පමණක් බවක් බවද අනාවරණය වී තිබේ. ඉතිරි මුදලට සරිලන ලෙස දී
ඇත්තේ හෙරොයින් ග්‍රෑ. 100කි. ඒ හෙරොයින් විකුණා මුදල් කරගන්නා ලෙස
රොටුඹ අමිල පවසා ඇතැයි පොලිස් විශේෂ කාර්ය බළකායේ තොරතුරු සඳහන් කළේය.
වෙඩි තැබීමට යොදාගත් බව කියන ගල්කටස් අවි දෙකක්ද පොලිස් විශේෂ කාර්ය
බළකාය විසින් සොයාගෙන ඇත.
අත්අඩංගුවට ගත් සැකකරුවන් දෙදෙනා ‘කැලෑ මහින්ද’ සහ ‘තේක්ක
සුද්දා’ නමින් හඳුන්වන අය බවත්, ඔවුන් දෙදෙනා අඟුණකොළපැලැස්ස
බන්ධනාගාරයේ රිමාන්ඩ් සිරකරුවන් ලෙස සිට ඇප මත පැමිණ මාස එකහමාරක්
වන බවත් පොලිස් විශේෂ කාර්ය බළකාය කියයි. මේ සැකකරුවන් දෙදෙනා මෙයට
පෙර ගිනි අවි භාවිත කරමින් මිනිස් ඝාතනවල යෙදී නැති බවත්, ගිනි අවි
සම්බන්ධයෙන් චෝදනා නැති බවත් විමර්ශනවලින් පෙනී ගොස් ඇත. එහෙත් ඔවුන්
දෙදෙනාට එරෙහිව කොල්කෑම් සහ සොරකම් චෝදනා විශාල ප්‍රමාණයක් ඇති බවද ඒ
සම්බන්ධයෙන් අධිකරණ කිහිපයකම නඩු 20ක් පමණ විභාග වන බවද පොලිස්
තොරතුරුවල දැක්වේ.
මේ සැකකරුවන් අතර සිටින කැලෑ මහින්ද නමැති අය මාකඳුරේ මධුෂ්ගේ
ගෝලයෙකි. මාකඳුරේ මධුෂ්ට අයත්ව තිබුණු මාලබේ ආරක්ෂක නිවස්නයක පවා ඔහු
කලක් නවාතැන් ගෙන සිට ඇති බව කියවේ. මධුෂ්ගේ ඩුබායි සාදයේදී ඩුබායි
පොලිස් අත්අඩංගුවට පත්ව මෙරටට පිටුවහල් කිරීමෙන් අනතුරුව රක්ෂිත
බන්ධනාගාරගත වූ රොටුඹ අමිල එහිදී නැවතත් කැලෑ මහින්ද සමඟ
සම්බන්ධකම් ගොඩනඟාගෙන සිට ඇති බව පොලිසිය කියයි.
ඒ සම්බන්ධකම්
ඔස්සේ රොටුඹ අමිල ඇප මත නිදහස් වීමෙන් අනතුරුව නැවතත් ඩුබායි වෙත
පලාගොස් තිබේ. එහි සිට දුරකතනවලින් කතාබහ කරමින් කැලෑ මහින්ද සමඟ
ඔහු සම්බන්ධකම් පවත්වාගෙන ගොස් තිබේ.
මෑතකදී රොටුඹ අමිල මේ කැලෑ මහින්දට ඇමතුම් දී ඇත්තේ ප්‍රංශයේ
භාවිත කරන දුරකතන අංකයකිනි. ඒ අනුව විශේෂ කාර්ය බළකාය සැක කරනුයේ
රොටුඹ අමිල මේ වන විට ප්‍රංශයේ රැඳී සිටින බවයි. රාමනායකගේ ඉන්දික කුමාර
නොහොත් කැලෑ මහින්ද නමැති පුද්ගලයා හා ජයවර්ධන අබේසිංහ පතිරණගේ
සඳකැලුම් ජයවර්ධන නමැති පුද්ගලයා සමඟ අත්අඩංගුවටගත් ගල්කටස්
වර්ගයේ ගිනි අවි 2ක්, බෝර 12 ජීව උණ්ඩ 2ක්, හෙරොයින් ග්‍රෑ. 100ක්, වෙඩි
තැබීමට පැමිණි බවට සැක කරන අංක BCF 1681 දරන යතුරුපැදිය හා රොටුඹ අමිල
සමඟ කතාබහ කළ ජංගම දුරකතන 3 වැඩිදුර විමර්ශන කටයුතු සඳහා කොළොන්න
පොලිස් ස්ථානයට භාර දුන් බව විශේෂ කාර්ය බළකාය සඳහන් කළේය.
විශේෂ කාර්ය බළකායේ අණ දෙන නිලධාරී ජ්‍යෙෂ්ඨ නියෝජ්‍ය පොලිස්පති
නීතිඥ වරුණ ජයසුන්දර මහතාගේ නියෝග හා උපදෙස් පරිදි, අධ්‍යක්ෂ බුද්ධි
ජ්‍යෙෂ්ඨ පොලිස් අධිකාරී එම්.එම්.කේ. විජේසිංහ මහතාගේ මඟපෙන්වීම
පරිදි, සහකාර පොලිස් අධිකාරී (බුද්ධි/ විශේෂ මෙහෙයුම්/ මත්ද්‍රව්‍ය නාශක
හා සංවිධානාත්මක අපරාධ මර්දන) සාගර කුලසේකර මහතාගේ අධීක්ෂණය මත,
විශේෂ කාර්ය බළකාය සංවිධානාත්මක අපරාධ මර්දන ඒකකය I හි
ස්‍ථානාධිපති පොලිස් පරීක්ෂක පි.කේ.ඩි.ආර්.ඒ.කේ. දිසානායක ඇතුළු
නිලධාරීන් කණ්ඩායමක් විසින් මිද්දෙනිය පොලිස් වසමේ ඇඟළුම් ආයතනයක්
අසල මේ සැකකරුවන් දෙදෙනා අත්අඩංගුවට ගෙන තිබේ.
(ගයාන් කුමාර වීරසිංහ, ඌරුබොක්ක ඒ.පී. දයාචන්දර)
