ලොව පුරා මිලියන 830කට අධික ජනතාවක් පීඩාවිඳින නිදන්ගත රෝගයක් වන දියවැඩියාව මුලින්ම හඳුනාගෙන ඉක්මනින් ක්රියාත්මක වුවහොත්, එය සුව කිරීමට හෝ සමනය කිරීමට හැකියාව ඇති බව නවතම සොයාගැනීමකින් අනාවරණය වී තිබෙනවා.
Massachusettsහි Joslin දියවැඩියා මධ්යස්ථානයේ ජ්යේෂ්ඨ මාණ්ඩලික වෛද්ය ඔසාමා හැම්ඩි පවසන්නේ ලොව පුරා සිටින දියවැඩියා රෝගීන්ගෙන් 91%ක් දෙවන වර්ගයේ දියවැඩියාවෙන් පෙළෙන බවයි.
දියවැඩියාව යනු අන්ධභාවය, වකුගඩු අකර්මන්යතාවය සහ හෘද රෝග ඇතිවීමේ අවදානම වැඩි කරන රෝගයක්.
කෙසේ වෙතත්, මෙය ජීවිත කාලය පුරාම පවත්වා ගත යුතු තත්වයක් නොවන බවයි ඔහු සඳහන් කළේ.
02 වැනි වර්ගයේ දියවැඩියාව ඇතිවන්නේ ඉන්සියුලින් ප්රතිරෝධය හෝ ප්රමාණවත් නොවන ඉන්සියුලින් නිෂ්පාදනය හේතුවෙන්.
එය රුධිරයේ අතිරික්ත ග්ලූකෝස් අවයවවලට විෂ සහිත වන අතර රුධිර වාහිනීවලට හානි කරනවා.
දියවැඩියාව අත් පා කැපීමට, හෘදයාබාධ හා ආඝාතයට ප්රධාන හේතුවක් වන්නේ මේ නිසයි.
එහිදී බර අඩු කර ගැනීම දියවැඩියාව සමනය කිරීමට වඩාත් ඵලදායී ක්රමයක් බවයි පර්යේෂකයන් පෙන්වාදෙන්නේ.
ඉන්සියුලින් ප්රතිරෝධය ආමාශය වැනි අවයව වටා ඇති අභ්යන්තර මේද ඉහළ මට්ටම් සමඟ සමීපව සම්බන්ධයි.
ශාරීරික ක්රියාකාරකම් බර අඩු කර ගැනීමට අමතරව, මාංශ පේශි ශක්තිමත් කරන අතර රුධිරයෙන් ග්ලූකෝස් උරා ගැනීමට ඇති හැකියාව වැඩි කරනවා.
ඒ අනුව ඇමරිකානු දියවැඩියා සංගමය නිර්දේශ කරන්නේ සතියකට අවම වශයෙන් පැය 2.5 ක මධ්යස්ථ ශාරීරික ක්රියාකාරකම් සහ සතියකට දෙවරක් ශක්ති පුහුණුවක් ලබා ගත යුතු බවයි.
ආහාර පාලනය සහ ජීවන රටාව ද මෙහිදී ඉතා වැදගත් බව පෙන්වා දෙන අතර සම්පූර්ණ කැලරි ප්රමාණය අඩු කිරීම සහ සුදු පාන්, සුදු බත් සහ පැස්ටා වැනි පිරිපහදු කළ ධාන්ය ගැනීම සීමා කිරීම ද වැදගත්.
එමෙන්ම එකතු කළ සීනි සම්පූර්ණයෙන්ම ඉවත් කිරීම සහ ඉහළ ග්ලයිසමික් දර්ශකයක් සහිත ආහාර සීමා කිරීම අත්යවශ්ය බවයි ඔවුන් පෙන්වා දෙන්නේ.
පර්යේෂකයින් පවසන්නේ තන්තු සහ ප්රෝටීන් ප්රමාණය වැඩි කිරීම, දිනකට වතුර වීදුරු අටක් පානය කිරීම, ආතතිය අඩු කර ගැනීම සහ පැය 7 ත් 9 ත් අතර ප්රමාණවත් නින්දක් ලබා ගැනීම රුධිරයේ සීනි මට්ටම පාලනය කිරීමට උපකාරී වන බවයි.
ඖෂධ නොමැතිව අවම වශයෙන් මාස තුනක්වත් ග්ලූකෝස් මට්ටම රෝග විනිශ්චය සඳහා වන සීමාවට වඩා අඩුවූ විට දියවැඩියාව සමනය වී ඇති බවට සලකනු ලබනවා.
දියවැඩියාවේ කාල සීමාව කෙටි නම් සහ බර අඩු කර ගැනීමේ ප්රතිශතය ඉහළ නම්, සමනය වීමේ මට්ටමේ ග්ලූකෝස් සංඛ්යා දින කිහිපයකින් හෝ සති කිහිපයකින් දැකීමට හැකි බවයි විශේෂඥයන් පෙන්වා දෙන්නේ.
නමුත් සැලකිය යුතු ලෙස බර වැඩි වුවහොත් හෝ අහිතකර ආහාර පුරුදු නැවත ඇති වුවහොත් රෝගය නැවත ඇතිවිය හැකි බව මතක තබා ගැනීම වැදගත් බව ද පර්යේෂකයන් අවධාරණය කරනවා.
