සේවයෙන් නෙරපන ලිපියට බයවූ දුම්රිය සේවකයෝ වර්ජනය අතහරිති

වර්ජනයේ නිරත වෙමින් සේවයට වාර්තා නොකළ සියලුම දුම්රිය සේවකයින් සඳහා “සේවය හැරගියා සේ
සලකා” ලිපි නිකුත්කළ බව ප්‍රවාහන අමාත්‍ය බන්දුල ගුණවර්ධන පැවසුවේ අද ( 11) පස්වරුවේය.

ඔහු වැඩිදුරටත් ප්‍රකාශ කළේ හමුදාව සහ ආරක්ෂක අංශ යොදාගෙන දුම්රිය සේවය පවත්වාගෙන යන බවය.
ඒ අතර රටේ රාජ්‍ය සේවා වෘත්තීය සමිති සමග සම්බන්ධව දැවැන්ත ඒකාබද්ධ වර්ජනයක් ක්‍රියාත්මක
කිරීම දක්වා වෘත්තීය සමිති අද සවස් වනවිට තීරණය කර තිබිණි.

කෙසේ වෙතත් මේ වනවිට ඇමතිවරයා දැක්වූ තර්ජනාත්මක ලිපිය වර්ජකයින්ගේ බියට හේතුවිය. සාකච්ඡාවකින් අනතුරුව වර්ජනය තාවකාලිකව අත්හිටවූ බව වෘත්තීය සමිති පවසයි.
මේ මොහොතේ සිට ක්‍රියාත්මක වන පරිදි දුම්රිය ස්ථානාධිපතිවරුන් ක්‍රියාත්මක කළ වර්ජනය අවසන් කර ඇති බව ලේකම් දුම්රිය ස්ථානාධිපති සංගමය නිවේදනය කළේය.
එකඟතාවලට අනුව අද (11) මධ්‍යම රාත්‍රියේ සිට වර්ජනය අතහැර නැවත සේවයට වාර්තා කිරීමට වර්ජනයෙන් නිරත වෘත්තීය සමිති තීරණය කර ඇති අතර අද මධ්‍යම රාත්‍රී 12 වන විට සේවයට වාර්තා කරන නිලධාරින් වෙනුවෙන් කිසිදු විනය ක්‍රියාමාර්ගයක් නොගන්නා බවට අමාත්‍යවරයා සහතික විය.