ChatGPT නිර්මාණය කළ OpenAI සමාගම පසුගිය වසරේ කැනඩාවේ සිදුවූ දරුණු පාසල් වෙඩි තැබීමක් සම්බන්ධයෙන් වැදගත් හෙළිදරව්වක් සිදුකර තිබෙනවා. සමාගම පවසන්නේ, සිද්ධියට මාස කිහිපයකට පෙර සැකකරුගේ ගිණුම් ක්‍රියාකාරකම් පිළිබඳව Royal Canadian Mounted Police (RCMP) වෙත දැනුම් දී තිබෙන බවයි.

OpenAI අනුව, “ප්‍රචණ්ඩ ක්‍රියාකාරකම් වර්ධනය කිරීම” සම්බන්ධයෙන් සිදුකළ අපයෝජන හඳුනාගැනීම් ක්‍රියාවලිය තුළ 18 හැවිරිදි ජෙසී වැන් රූට්සෙලාර්ගේ ගිණුම හඳුනාගෙන තිබෙනවා. කෙසේ වෙතත්, එම අවස්ථාවේදී නීතිය ක්‍රියාත්මක කිරීම සඳහා යොමු කිරීමට ප්‍රමාණවත් “ආසන්න සහ විශ්වාසනීය තොරතුරු” නොපවතින බව තීරණය කළ බව සමාගම පවසා තිබෙනවා.

2025 ජුනි මාසයේදී එම ගිණුම භාවිතයේදී ප්‍රතිපත්ති උල්ලංඝනය කිරීම හේතුවෙන් තහනම් කර ඇත.

සිද්ධිය සහ පසුබැසීම

පසුගිය සතියේ British Columbia හි දුරස්ථ ප්‍රදේශයක සිදුවූ මෙම වෙඩි තැබීමෙන් පුද්ගලයින් අට දෙනෙකු ජීවිතක්ෂයට පත්වූ අතර, සැකකරු පසුව ඔහු විසින්ම වෙඩි තබාගෙන මිය ගොස් තිබෙනවා. වින්දිතයින් අතර ගුරු සහායකයෙකු සහ වයස අවුරුදු 12–13 අතර සිසුන් කිහිප දෙනෙකුද සිටින බවයි RCMP සඳහන් කර තිබුණේ.

සිද්ධිය පිළිබඳව දැනගත් වහාම OpenAI සමාගම RCMP සමඟ සම්බන්ධ වී, ChatGPT සමග සම්බන්ධිත තොරතුරු විමර්ශනය සඳහා ලබා දුන් බවද ප්‍රකාශ කර තිබෙනවා. මේ පිළිබඳව මුල් වාර්තාව ප්‍රකාශයට පත් කර තිබුණේ The Wall Street Journal විසිනි.

නීතිමය සහ ආරක්ෂක සීමා

OpenAI පවසන්නේ, පරිශීලකයෙකු නීතිය ක්‍රියාත්මක කිරීම සඳහා යොමු කිරීමට අවශ්‍ය සීමාව වන්නේ “අනෙක් අයට බරපතල ශාරීරික හානියක් සිදුවීමේ ආසන්න සහ විශ්වාසනීය අවදානමක්” පවතින අවස්ථාවන්හිදී පමණක් බවයි. එම අවස්ථාවේදී එවැනි සෘජු සැලසුම් හඳුනා නොගත් බව සමාගම අවධාරණය කර තිබෙනවා.

වර්තමානයේ RCMP විසින් සැකකරුගේ ඩිජිටල් හා භෞතික සාක්ෂි පිළිබඳ ගැඹුරු සමාලෝචනයක් සිදු කරමින් පවතින අතර, සිද්ධියේ අරමුණ තවමත් හරි හැටි පැහැදිලි නොවූ බවයි සඳහන් වන්නේ.

මෙය 2020 දී Nova Scotia හි සිදුවූ ප්‍රහාරයෙන් පසු කැනඩාවේ සිදුවූ මාරාන්තිකම ප්‍රහාරය ලෙස සැලකෙනවා.