කොළඹ මහ පල්ලිය විසින් නිවේදනය කර ඇති පරිදි, ‘ෂව්වාල්’ මාසයේ නව අඩ සඳ ඊයේ (19) නොපෙනීම හේතුවෙන්, ශ්රී ලංකාවේ මුස්ලිම් ප්රජාව මෙම වසරේ ‘ඊදුල්-ෆිතර්’ උත්සවය සෙනසුරාදා (21) දින සමරනු ඇත.
ඒ අනුව, ශුද්ධ වූ රාමසාන් මාසය දින 30 කින් සම්පූර්ණ වන අතර, ෂව්වාල් මාසයේ පළමු දිනයද එදින ආරම්භ වේ. මෙම තීරණය මුස්ලිම් ආගමික හා සංස්කෘතික කටයුතු දෙපාර්තමේන්තුව, කොළඹ මහ පල්ලිය සහ සමස්ත ලංකා ජමියතුල් උලමා විසින් ඒකමතිකව ප්රකාශ කර තිබෙනවා.
‘ඊදුල්-ෆිතර්’ යනු “උපවාසය අත්හැරීමේ උත්සවය” ලෙස හැඳින්වෙන අතර, රාමසාන් මාසයේ අවසානය සනිටුහන් කරමින් ලෝකය පුරා මුස්ලිම්වරුන් විසින් මහත් භක්තියෙන් සමරනු ලබන පූජනීය උත්සවයකි.
මෙම දිනය මිතුරන්, පවුලේ අය සහ සමාජය සමඟ සතුට, සෙනෙහස හා එකමුතුකම බෙදාගන්නා විශේෂ අවස්ථාවක් වනවා.
විවිධ රටවල ඊද් උත්සවයේ දිනය අඩ සඳ දැකීම මත වෙනස් වනවා.