එක්සත් ජනපදයේ ඔක්ලහෝමා ප්රාන්තයේ ආකේඩියා විල ආසන්නයේ පැවති තරුණයින්ගේ සාදයක් අතරතුර සිදු වූ වෙඩි තැබීමකින් අවම වශයෙන් පුද්ගලයින් 12 දෙනෙකු රෝහල් ගත කර ඇති බව විදෙස් මාධ්ය වාර්තා කර තිබෙනවා.
ඉරිදා රාත්රී 9.00ට පමණ මෙම වෙඩි තැබීම සිදුව ඇති අතර, ඔක්ලහෝමා නගරයට උතුරින් පිහිටි එඩ්මන්ඩ් ප්රදේශයේ තරුණයින්ගේ රැස්වීමක් අතරතුර මෙම භීෂණකාරී සිදුවීම වාර්තා වී තිබෙනවා.
එඩ්මන්ඩ් පොලිස් දෙපාර්තමේන්තුව සඳහන් කළේ, සිද්ධිය සම්බන්ධයෙන් මේ වන තෙක් කිසිදු සැකකරුවෙකු අත්අඩංගුවට ගෙන නොමැති බවයි.
පොලිස් ප්රකාශිකා එමිලි වෝඩ් පැවසුවේ, “මෙය අතිශය භයානක තත්ත්වයක්. සැකකරුවන් හඳුනා ගැනීම සඳහා අපි දැඩි පරීක්ෂණයක් ආරම්භ කර තිබෙනවා,” යනුවෙනි.
තුවාල ලැබූවන්ගෙන් බොහෝදෙනෙකු අසල රෝහල්වලට ඇතුළත් කර ඇති අතර, තවත් පිරිසක් තමන් විසින්ම රෝහල් වෙත ගොස් ඇති බව වාර්තා වනවා.
ඔක්ලහෝමා නගරයේ ඉන්ටෙග්රිස් හෙල්ත් බැප්ටිස්ට් වෛද්ය මධ්යස්ථානයේ පුද්ගලයින් නවදෙනෙකු ප්රතිකාර ලබන අතර, ඉන්ටෙග්රිස් හෙල්ත් එඩ්මන්ඩ් රෝහලේ තවත් තිදෙනෙකු ප්රතිකාර ලබන බව විදෙස් මාධ්ය සඳහන් කර තිබෙනවා.
තුවාල ලැබූවන්ගේ තත්ත්වය පිළිබඳ නිල යාවත්කාලීන කිරීමක් මෙතෙක් නිකුත් කර නොමැති අතර, වින්දිතයින්ගේ සංඛ්යාව තවදුරටත් ඉහළ යා හැකි බවට පොලිසිය අනතුරු අඟවා තිබෙනවා.
මෙම සිදුවීම වාර්තා වූ ආකේඩියා විල, මසුන් ඇල්ලීම, බෝට්ටු පැදීම, විනෝද චාරිකා සහ කඳවුරු බැඳීම සඳහා ජනප්රිය ස්ථානයක් ලෙස සැලකෙනවා.
එඩ්මන්ඩ් නගරය මීට පෙරද එක්සත් ජනපද ඉතිහාසයේ දරුණුම වෙඩි තැබීම් අතරින් එකකට මුහුණ දුන් ප්රදේශයක් ලෙස සැලකෙනවා.