ඉන්දීය ධීවර යාත්‍රා පැහැරගෙන කොටස් කර විකිණූ ජාවාරමක් සම්බන්ධයෙන් පුද්ගලයින් තිදෙනෙකු ඊයේ (31) අත්අඩංගුවට ගෙන තිබෙනවා.
07 දෙනෙකුගෙන් යුත් මේ කණ්ඩායම යාපනය, පේදුරුතුඩුව ප්‍රදේශයේ රැඳී සිටිමින් ධීවර යාත්‍රා පැහැරගෙන කොටස්වලට ගලවා අලෙවි කිරීම කාලයක් තිස්සේ කරගෙන ගොස් තිබෙන බව පැවසෙනවා.
පසුගිය දිනක ඉන්දීය යාත්‍රාවක් පැහැරගෙන කොටස් කර අලෙවි කිරීමෙන් පසුව එහි මුදල් බෙදා ගැනීමට යාමේදී ආරවුලක් ඇතිවී තිබෙන බවත් එකිනෙකාට පහර දීගෙන ඇති බවත් පැවසෙනවා.
එහිදී එක් පුද්ගලයෙකු පේදුරුතුඩුව පොලීසියට ගොස් සිද්ධිය සම්බන්ධයෙන් පැමිණිලි කිරීමත් ඒ ගැන විභාග කිරීමේදී මෙම හොරකම පිළිබදව තොරතුරු අනාවරණය වී තිබෙනවා.
සැකකරුවන් ලබා දුන් තොරතුරුවලට අනුව ඉන්දීය යාත්‍රාවේ තිබූ බෝට්ටු එන්ජින් දෙකක් ඇතුලු රුපියල් ලක්ෂ 08ක් පමණ වටිනා භාණ්ඩ වෙළඳ සැලකට අලෙවි කොට තිබියදී සොයාගෙන තිබෙනවා.
ඉන්දීය යාත්‍රාව පැහැර ගත් බව එම ධීවරයින් මීට දින කිහිපයකට ඉහතදී රාමේස්වරන් පොලීසියට පැමිණිලි කොට ඒ සම්බන්ධයෙන් යාපනයේ පිහිටි නියෝජ්‍ය ඉන්දීය කොන්සෝල් ජෙනරාල් කාර්යලය දැණුවත් කිරීමටද පියවර ගෙන තිබුණා.
එබැවින් සොරකම පිළිබදව සියලු තොරතුරු සනථ කර ගැනීමට හැකියාව ලැබී ඇති බවයි පේදුරුතුඩුව පොලීසිය පවසන්නේ.
