ඩබ්ලිව්.එම්. මෙන්ඩිස් සහ සමාගම විසින් ගෙවිය යුතු හිඟ සුරාබද්ද හා ඊට අදාළව 3% මාසිකව ගෙවිය යුතු අධිභාර නොගෙවීම නිසා මත්පැන් නිෂ්පාදන බලපත්‍රය අද (05)දා සිට අත්හිටුවන බව සුරාබදු දෙපාර්තමේන්තුව සඳහන් කර තිබෙනවා.
මෙම සමාගම විසින් ගෙවිය යුතු රුපියල් බිලියන පහයි දශම හතක මුදල ගෙවීම පැහැර හැරීම නිසා සුරාබදු ආඥා පනතේ නෛතික විධිවිධාන ප්‍රකාරව මෙම සමාගමේ මත්පැන් නිෂ්පාදන බලපත්‍රය අද සිට අත්හිටුවීමට තීරණය කර තිබෙන බවද එම දෙපාර්තමේන්තුව මාධ්‍ය නිවේදනයක් නිකුත් කරමින් ඊයේ (04දා) සඳහන් කළා.
මේ අනුව, අද සිට මත්පැන් නිෂ්පාදන ක්‍රියාවලිය අත්හිටුවීමටත් හිඟ බදු හා අධිභාරය තවදුරටත් ගෙවීම පැහැර හරින්නේ නම් එම සමාගමට නිකුත් කර ඇති සියලුම සුරාබදු මත්පැන් බලපත්‍ර මේ මස 31 දිනෙන් ඔබ්බට දීර්ඝ නොකිරීමටත් කටයුතු කරන බවද එම නිවේදනය මඟින් පෙන්වා දී තිබෙනවා.
