මත්පැන් බව සිතා මහ මුහුදේ පා වූ බෝතලයක තිබූ යම් දියර වර්ගයක් පානය කිරීමෙන් ජීවිතක්ෂයට පත් ධීවරයාගේ මරණයට හේතුව සහ ඔහු විසින් පානය කර ඇති දියර වර්ගය හඳුනාගැනීමට සිරුරේ කොටස් රස පරීක්ෂකවරයා වෙත යොමු කරමින් මරණය සම්බන්ධයෙන් විවෘත තීන්දුවක් දීමට පශ්චාත් මරණ පරීක්ෂණය කළ හම්බන්තොට මහ රෝහලේ අධිකරණ විශේෂඥ වෛද්‍ය දිල්හානී අමරසිංහ මහත්මිය පියවර ගත්තාය.
ඉකුත් 4 දා තංගල්ල ධීවර වරායෙන් පිටත්ව ගිය ඩෙවෝන් 5 බහුදින ධීවර වරායේ සිටි ධීවරයෝ පස් දෙනෙක් මේ දියර වර්ගය පානය කර ජීවිතක්ෂයට පත් වූහ. මෙතෙක් ගොඩබිමට රැගෙනැවිත් තිබුණේ ඔවුන්ගෙන් ඒ එක් අයකුගේ සිරුරක් පමණි. ඒ සිංගප්පූරු වක් මඟින් බේරාගනු ලැබූ පුද්ගලයන් දෙදෙනා අතුරින් පසුව නෞකාවේදී මිය ගිය පුද්ගලයාගේය. ඔහුගේ සිරුර ගොඩබිමට රැගෙනවිත් තිබුණේ නාවික හමුදාව විසිනි. ඒ දිවිබේරාගත් පුද්ගලයාද සමඟිනි. සෙසු සිරුරු ඉදිරි දින කිහිපය තුළ ගොඩබිමට රැගෙන ඒමට නියමිතය. මෙසේ විවෘත තීන්දුවක් දී තිබුණේ තංගල්ල දංකැටියේ පදිංචි ජී.එම්. අජිත් කුමාර (56) යන අයගේ සිරුර සම්බන්ධයෙනි. මියගිය අයගේ ශරීරයේ කොටස්, අමාශයේ ඇති දියර, රුධිරය, රජයේ රස පරීක්ෂකවරයා වෙත යවා වාර්තාවක් ගැනීමෙන් අනතුරුව මරණයට හේතුව ප්‍රකාශ කරන බව
අධිකරණ වෛද්‍ය විශේෂඥවරිය සඳහන් කර ඇත. අවසන් කටයුතු කිරීම සඳහා මළ සිරුර පශ්චාත් මරණ පරීක්ෂණයෙන් පසු ඥාතීන්ට භාර දී තිබේ.
සිද්ධීයෙන් දිවි බේරාගෙන සිටින එකම පුද්ගලයා මේ වන විට හම්බන්තොට රෝහලේ ප්රතිකාර ලබමින් සිටින අතර, අම්බලන්තොට හතර ඇළ පදිංචි පී.ජී. සුමිත් කුමාර නමැති ඔහුගෙන් ප්රකාශයක් ගැනීම හා ඔහු පරීක්ෂා කිරීම හම්බන්තොට මහ රෝහලේ අධිකරණ වෛද්‍ය නිලධාරී ටී.සී.සී. පෙරේරා මහතා විසින් සිදු කරනු ලැබීය. මේ අතර ඔහුගේ මූත්‍ර හා රුධිර නියැදියක් ගෙන ඒවාද පරීක්ෂණ සඳහා රජයේ රස පරීක්ෂකවරයා වෙත යැවීමට පියවර ගෙන ඇත. මුහුදේ පා වෙමින් තිබූ බෝතලයක් ගෙන එහි අඩංගු දියර බෝට්ටුවේ ගමන් ගත් හය දෙනාම පානය කළ බවත්, තමාද ටිකක් බිවූ බවත් ටික වේලාවක් යන විට ක්ලාන්තය වැනි වෙනස්කම් ඇති වූ බවත් ඔහු අධිකරණ වෛද්යවරයා වෙත ප්‍රකාශ කර තිබේ.
(ලුණම – සනත් ගමගේ)
ඔබේ ප්‍රතිචාරය කුමක්ද?
Read Other News
