නිවුන් දරුවන් පස් දෙනකුට සමාන උදරයේ විශාලත්වයකින් යුක්ත මවකගේ ගර්භාශයේ තිබූ කිලෝ පහළොවක් බරැති ගෙඩියක් සාර්ථක සැත්කමකින් ඉවත් කිරීමට හැකි වූ බව සැත්කම සිදු කළ හම්බන්තොට මහ රෝහලේ ප්‍රසව හා නාරි විශේෂඥ වෛද්‍ය සමන්ත සමරවික්රම මහතා සඳහන් කළේය. වීරකැටිය ප්රදේශයේ පදිංචි වයස අවුරුදු තිස් අටක් වන එක්දරු මවක‍ට ඊයේ උදෑසන (03) සැත්කම සිදු කර ඇත. මේ වන විට එම මව නිරෝගී සුවයෙන් පසුවන බව සැත්කම සිදු කළ වෛද්යවරු සඳහන් කරති. මෙම සැත්කම සිදු කර ඇත්තේ ප්‍රසව හා නාරි විශේෂඥ වෛද්‍ය සමන්ත සමරවික්රම සමඟ සහාය වෛද්යවරුන් දෙදෙනකු සහ නිර්වින්දන විශේෂඥ වෛද්යවරයකු හා හෙද නිලධාරිනියන් තිදෙනකුගෙන් යුත් කණ්ඩායමකි.
වසර ගාණක සිට ටිකෙන් ටික උදරය ඉදිමෙමින් තිබූ බැවින් ඇය විවිධ වෛද්යවරුන්ගෙන් ප්රතිකාර ලබාගෙන ඇත.
උදරය උසුලාගත නොහැකි තරමට ඉදිරියට නෙරා ඒම හේතුවෙන් හම්බන්තොට මහ රෝහලට පැමිණ ප්‍රසව හා නාරි වෛද්යවරයා මුණගැසී තිබේ. ඇගේ රෝගී තත්ත්වය නිසි ලෙස හඳුනාගෙන කඩිනමින් සැත්කම සිදු කළ බව විශේෂඥ වෛද්‍ය සමන්ත සමරවික්රම මහතා සඳහන් කළේය.
මෙම රෝගී තත්ත්වය Fibroid (ෆයිබ්රොයිඩ්) තත්ත්වයක් බවත් පේෂීන් ඉදිමී ගැටගැසීම හේතුවෙන් මෙම තත්ත්වය ඇති වන බව ද වෛද්යවරයා සඳහන් කළේය. තවත් දින කිහිපයක් ඇය නිසි ප්රතිකාරයක් නොගෙන සිටියේ නම් මිය යන්නට පවා ඉඩ තිබුණු බව ද වෛද්‍ය සමන්ත සමරවික්රම මහතා කීය.
උදරයේ යම් යම් වේදනාකාරී තත්ත්වයන් ඇති වුවහොත්, එය දිගින් දිගටම පවතී නම් විශේෂඥ වෛද්යවරයකු ලවා පරීක්ෂා කර ගන්නා ලෙස වෛද්‍ය සමන් සමරවික්රම මහතා සියලු මවුවරුන්ගෙන් ඉල්ලීමක් ද කළේය.
ඔබේ ප්‍රතිචාරය කුමක්ද?
Read Other News
