මහනුවර ගලහා ප්රදේශයෙන් සොයාගත් පාෂාණයට ඉහළ වාණිජ හෝ වෙළෙඳ වටිනාකමක් නොමැති බව ජාතික මැණික් හා ස්වාර්ණාභරණ අධිකාරිය දැනුම් දී තිබෙනවා.
පර්වතයේ ධාරක පර්වතයක් තුළ “Labradorite” (ලැබ්රඩෝරයිට්) නම් ඛනිජය කුඩා ප්රමාණයක් තැන්පත් වී ඇති බවයි නිවේදනයක් නිකුත් කරමින් එම අධිකාරිය පවසා ඇත්තේ.
ලැබ්රඩෝරයිට් ඛනිජය අර්ධ වශයෙන් වටිනාකමක් උසුලන මැණික් පාෂාණයක් ලෙස වර්ගීකරණය කර ඇති බව එහි සඳහන්.
නමුත් එම පාෂාණය සඳහා ඉහළ වාණිජ හෝ වෙළෙඳපොළ වටිනාකමක් නොමැති බව ජාතික මැණික් හා ස්වාර්ණාභරණ අධිකාරිය වැඩිදුරටත් දැනුම් දෙනවා.
මීට දින දෙකකට පෙර, මහනුවර ගලහා දෙල්තොටවත්ත කල්ලන්තැන ශ්රී මුතු මාරි අම්මන් දේවාලයේ අසල තිබූ කළුගල් පාෂාණයක නිල් පැහැති මැණික් ගලක් ඇති බවටයි වාර්තා වූයේ.
ඒ අනුව ඊයේ (21) රාත්රියේ ජාතික මැණික් හා ස්වාර්ණාභරණ අධිකාරියේ නිලධාරීන් එම ස්ථානයට පැමිණ තිබුණේ එම පාෂාණය පරික්ෂා කිරීම සඳහායි.
පසුව ඔවුන් අදාළ පාෂාණයෙන් සාම්පල කැබලි තුනක් ගෙන පරික්ෂාවට ලක් කිරීමට කටයුතු කළා.
ඒ අනුවයි ඊට අදාළ වාර්තාව මෙලෙස නිකුත් කර තිබුණේ.
