රජයේ වෛද්ය නිලධාරීන්ගේ සංගමය (GMOA) විසින් වෛද්යවරුන්ගේ නීති විරෝධී මාරුවීම් ඇතුළු ඉල්ලීම් කිහිපයක් මුල් කරගනිමින් අද (31) පෙරවරු 8.00 සිට දිවයින පුරා සංකේත වැඩ වර්ජනයක් ආරම්භ කිරීමට තීරණය කර තිබෙනවා.
සංගමයේ ලේකම් වෛද්ය ප්රභාත් සුගතදාස මහතා සඳහන් කළේ, මෙම වෘත්තීය සමිති ක්රියාමාර්ගය දිවයින පුරා සියලුම රෝහල් ආවරණය කරන බවයි. කෙසේ වෙතත්, මාතෘ රෝහල්, ළමා රෝහල්, මහරගම අපේක්ෂා රෝහල, විශේෂිත වකුගඩු ඒකක, ත්රිවිධ හමුදා රෝහල් සහ ජාතික මානසික සෞඛ්ය ආයතනය මෙයින් නිදහස් කර ඇති බව ද ඔහු වැඩිදුරටත් පවසා තිබෙනවා.
තවද, රජය විසින් ඔවුන්ගේ ගැටළු සඳහා ප්රතිචාර නොලැබුවහොත්, අනාගතයේදී තවදුරටත් දැඩි වෘත්තීය සමිති ක්රියාමාර්ගයන්ට යොමු වීමට සිදුවිය හැකි බවටද අනතුරු ඇඟවීමක් කර තිබෙනවා.
මේ අතර, සෞඛ්ය නියෝජ්ය අමාත්ය හංසක විජේමුණි මහතා පවසන්නේ, වෛද්යවරුන් විසින් මෙවැනි වැඩ වර්ජන ක්රියාමාර්ග මහා පරිමාණයෙන් සිදු කරනු ඇතැයි තමන් විශ්වාස නොකරන බවත්, ගැටළු සම්බන්ධයෙන් සාකච්ඡා කිරීමට රජය සූදානම් බවත්ය.
හදිසි සේවාවන්ට පමණක් සීමා වූ රෝහල් සේවාවන් හේතුවෙන් අද දිනයේ ප්රතිකාර ලබා ගැනීමට පෙර අදාළ රෝහලේ තත්ත්වය පිළිබඳව තහවුරු කරගන්නා ලෙස ජනතාව දැනුවත් කර තිබෙනවා.