වෛද්ය ගබඩාවෙන් ගින්න ආරම්භ වූ බවට සැක
අද (09) අලුයම යාපනය ශික්ෂණ රෝහල තුළ හදිසි ගින්නක් හටගෙන ඇති බව වාර්තා වනවා.
ආරංචි මාර්ග සඳහන් කරන්නේ, ගින්න රෝහලේ වෛද්ය ගබඩා අංශයෙන් ආරම්භ වී ඇති බවට මූලික සැක පවතින බවයි.
ගින්න පාලනයට ඒකාබද්ධ මෙහෙයුමක්
ගින්න මැඩපැවැත්වීම සඳහා යාපනය මහ නගර සභා ගිනි නිවන හමුදාව, රෝහල් කාර්ය මණ්ඩලය, ආරක්ෂක හමුදා සහ පොලිසිය එක්ව විශේෂ මෙහෙයුමක් ක්රියාත්මක කර තිබෙනවා.
කඩිනම් ක්රියාමාර්ග හේතුවෙන් ගින්න පාලනය කිරීමට හැකිවී ඇති අතර, රෝහල තුළ සිටි රෝගීන්ගේ සහ කාර්ය මණ්ඩලයේ ආරක්ෂාව තහවුරු කිරීමටද පියවර ගෙන තිබූ බව වාර්තා වනවා.
ගින්නට හේතුව තවමත් තහවුරු කර නැහැ
ගින්න හටගැනීමට නිශ්චිත හේතුව මෙතෙක් තහවුරු වී නොමැති අතර, සිදුවූ දේපළ හානිය පිළිබඳවද නිල තොරතුරු නිකුත් කර නොමැත.
අදාළ බලධාරීන් මේ වනවිට සිද්ධිය සම්බන්ධයෙන් වැඩිදුර විමර්ශන ආරම්භ කර ඇති බවටයි වාර්තා වන්නේ.
