සමාජ මාධ්‍ය ඉතිහාාසය වෙනස් කළ , ක්‍රිස්ටියානෝ රොනාල්ඩෝ..

පාපන්දු ඉතිහාසයේ සිය නම ඉහළින් ම රැඳවූ ක්‍රිස්ටියානෝ රොනාල්ඩෝ, සමාජ මාධ්‍ය ඉතිහාසය අලුතින් ලියමින් පෙරළිකාර ගමනක නියැලෙනවා.

ඊට ආසන්නතම උදාහරණය ඔහුගේ යූටියුබ් ආගමනය.

සිය YouTube නාලිකාව දියත් කර එහි පළමු මිනිත්තු 90 තුළ මිලියනයකට වඩා ග්‍රාහකයින් තමන් සන්තක කරගැනීමට ඔහු පසුගියදා සමත් වුණා.

එයාකාර වාර්තා තැබූ ඔහු, සිය සමාජ මාධ්‍ය වේදිකාවන් හි “බිලියන 1 ක අනුගාමිකයින්” (1 BILLION followers) සම්පූර්ණ කරගැනීමට මේ වෙද්දි සමත්කම් දක්වා අවසන්.

ඒ සුවිශේෂී ආරංචිය ගැන ඔහු X හි සටහනක් ද තබා තිබුණා.

එහි ඔහු විශේෂ කරලා තිබුණෙ, “එය ක්‍රීඩාවට එහා ගිය ආදරය පිළිබඳ සාක්ෂියක්” වන බව.

එහිදී රොනාල්ඩෝ රසිකයින්ට ස්තුතිය පුදකර තිබූ අතර ම තමන් මැඩෙයිරා හි කුඩා පිරිමි ළමයෙකුගේ සිට විශිෂ්ටතම ක්‍රීඩකයෙකු බවට පත්වීම දක්වා වූ ගමන ගැන ද ආවර්ජනය කර තිබීම විශේෂයි.

ඒ අනුව සියලුම සමාජ මාධ්‍ය වේදිකා හරහා අනුගාමිකයින් බිලියන 1 සීමාව පසු කළ පළමු පුද්ගලයා බවට පත්වන්නේත් ඔහුයි.

x හි අනුගාමිකයින් මිලියන 100 කට වඩා වැඩි පිරිසකට හිමිකම් කියන ඔහුගේ Instagram හි අනුගාමිකයන් ගණන මිලියන 600 කට වඩා වැඩියි.

මෑතකදී දියත් කළ යූ ටියුබ් නාලිකාව, මේ වන විට ග්‍රාහකයින් මිලියන 60 ක් රැස් කරගෙන.

ඔහුගේ ෆේස්බුක් හි මිලියන 170කට අධික අනුගාමිකයින් සිටින අතර ම චීන සමාජ මාධ්‍ය වේදිකාවල ද රොනාල්ඩෝ සිය අණසක පතුරා අවසන්.

ඒ වගේම UEFA Nations League තරඟාවලියේදී ක්‍රොඒෂියාවට එරෙහිව පෘතුගාලය වෙනුවෙන් ක්‍රීඩා කරන අතරතුර රොනාල්ඩෝ ඔහුගේ 900 වැනි වෘත්තීය ගෝලය වාර්තා කරමින් පසුගියදා තවත් සුවිශේෂී කඩඉමක් පසුකළ වගත් යළි මතක් කළ යුතුයි.