මධ්ය පෙරදිග කලාපයේ වැඩිවෙමින් පවතින යුධ උණුසුමත් සමඟ ලෝක තෙල් වෙළඳපොළ දැඩි බලපෑමකට ලක්ව තිබෙනවා. සඳුදා දිනයේදී 29% කින් ඉහළ ගිය තෙල් මිල, අඟහරුවාදා වන විට 2022 න් පසු වාර්තා වූ ඉහළම අගයට ළඟා වූ අතර, එම තත්ත්වය සමඟ ගෝලීය කොටස් වෙළඳපොළවල්ද ඉහළ යාමක් පෙන්නුම් කළා.
එක්සත් ජනපදයේ ඉහළ යන පෙට්රල් මිල ජනතාව අතර දැඩි කනස්සල්ලක් මතුවීමට හේතුවී ඇති අතර, නොවැම්බර් මාසයේ පැවැත්වීමට නියමිත මධ්ය කාලීන මැතිවරණයට පෙර එය ප්රධාන දේශපාලන මාතෘකාවක් බවට පත්ව තිබෙනවා. රොයිටර්/ඉප්සෝස් මත විමසුමකට අනුව ඇමරිකානුවන්ගෙන් 67% ක් ඉදිරි මාසවලදී ගෑස් මිල තවදුරටත් ඉහළ යනු ඇතැයි අපේක්ෂා කරන අතර, යුද්ධය අනුමත කරන ප්රමාණය 29% ක් පමණක් බව හෙළි වී තිබෙනවා.
මේ අතර ඉරානයේ තෙල් පිරිපහදුවකට එල්ල වූ ප්රහාරයක් හේතුවෙන් ටෙහෙරානය කළු දුමාරයෙන් වැසී ගිය බව වාර්තා වනවා. ලෝක සෞඛ්ය සංවිධානය අනතුරු ඇඟවූයේ එම ගින්න ආහාර, ජලය සහ වාතය දූෂණය වීමේ අවදානමක් ඇති කළ හැකි බවයි.
තවද ඉරානයෙන් එල්ල කරන ලද බැලස්ටික් මිසයිලයක් නේටෝ ගුවන් ආරක්ෂක පද්ධති විසින් බිම හෙළා ඇති බව තුර්කිය ප්රකාශ කළ අතර, එය මෙම යුද්ධයේ දෙවන එවැනි සිදුවීම ලෙස වාර්තා වේ. මේ සම්බන්ධයෙන් ඉරානයෙන් තවමත් නිල ප්රතිචාරයක් ලැබී නොමැත.
එමෙන්ම ඊශ්රායල හමුදාව මධ්යම ඉරානයේ සහ ලෙබනන් අගනුවර බේරූට් වෙත නව ප්රහාර දියත් කළ බවත්, ඉරානයේ පිටුබලය ලබන හිස්බුල්ලා මිලීෂියාව දේශසීමාව හරහා වෙඩි තැබීමෙන් පසු මෙහෙයුම් තවදුරටත් ව්යාප්ත කර ඇති බවත් වාර්තා වනවා.
මේ අතර ඕස්ට්රේලියාව ඉරාන කාන්තා පාපන්දු කණ්ඩායමේ ක්රීඩිකාවන් පස් දෙනෙකුට මානුෂීය වීසා ලබා දී තිබෙනවා. ඔවුන් තම මව් රටේ ඇති අනතුරු සහ හිංසා පීඩාවලට බියෙන් සරණාගතභාවය ඉල්ලා සිට ඇති අතර, මැද පෙරදිග කලාපයේ ආරක්ෂාව සඳහා හමුදා නිරීක්ෂණ ගුවන් යානා සහ මිසයිල එක්සත් අරාබි එමීර් රාජ්යයට යැවීමටද කැන්බරා පොරොන්දු වී තිබෙනවා.
මෙවැනි වාතාවරණයක් තුළ මැද පෙරදිග උණුසුම ලෝක බලශක්ති වෙළඳපොළටත්, ගෝලීය ආර්ථිකයටත් තවදුරටත් බලපෑම් ඇති කළ හැකි බව විශ්ලේෂකයින් පෙන්වා දෙයි.
