“Zootopia 2” චිත්රපටය, 2019 වසරේ තිරගත වූ “Frozen 2” චිත්රපටය අභිබවා යමින් ඩිස්නි ඉතිහාසයේ වැඩිම ආදායමක් ඉපැයූ සජීවීකරණ (Animation) චිත්රපටය බවට පත්ව තිබෙනවා.
මෙම සිනමාපටය නිෂ්පාදනය කරන්නේ ලොව සුපතල වෝල්ට් ඩිස්නි ඇනිමේෂන් ස්ටූඩියෝස් (Walt Disney Animation Studios) විසින්.
ඩිස්නි සමාගම විසින් පසුගිය බදාදා නිකුත් කරන ලද වාර්තාවලට අනුව, මෙම චිත්රපටය මේ වන විට අමෙරිකානු ඩොලර් බිලියන 1.46ක බොක්ස් ඔෆිස් ආදායමක් වාර්තා කර තිබෙනවා.
ඒ අනුව මීට පෙර පෙරමුණේ සිටි “Frozen 2” චිත්රපටය පසුකිරීමට “Zootopia 2” සමත්ව ඇති අතර එම චිත්රපටය උපයා තිබූ ආදායම ඩොලර් බිලියන 1.45ක්.
මෙම චිත්රපටය නිකුත් වී දින 17ක් ඇතුළත ඩොලර් බිලියන 1ක සන්ධිස්ථානයක් කරා ළඟා වූ අතර, එය ඉතිහාසයේ PG ශ්රේණිගත කිරීම් අනුව වේගවත්ම චිත්රපටයයි.
එමෙන්ම මෙම සාර්ථකත්වයට ප්රධානතම හේතුව වී ඇත්තේ චීනයෙන් ලැබුණු ඉහළ ප්රතිචාර බවයි විදෙස් මාධ්ය සඳහන් කරන්නේ.
චීනයේ පමණක් මෙම චිත්රපටය ඩොලර් මිලියන 560කට වඩා උපයා ඇති අතර, එහි ප්රදර්ශනය ආරම්භ කළ මුල් සති අන්තයේ චීනයේ මුළු සිනමා ටිකට්පත් අලෙවියෙන් සියයට 95ක්ම හිමිකර ගැනීමට සමත්ව තිබෙනවා.
මාධ්ය වාර්තා දක්වන්නේ “Zootopia 2” දේශීය වශයෙන් ඩොලර් මිලියන 333 ක් සහ විදේශයන්හි ඩොලර් බිලියන 1.13 ක දැවැන්ත ආදායමක් උපයා ඇති බවත්, නත්තල් නිවාඩු සති අන්තයේ දී සහ එය නිකුත් වූ පස්වන සතියේදී බොක්ස් ඔෆිස් ආදායම ඉහළ ගිය බවයි.
එසේම වෝල්ට් ඩිස්නි ඇනිමේෂන් ස්ටූඩියෝස් ඉතිහාසයේ ඩොලර් බිලියනය ඉක්මවා ගිය පස්වන චිත්රපටය මෙය වන බවද සඳහන්.
මේ අතර “Zootopia 2” ඇතුළුව, මෙම වසරේ ගෝලීය වශයෙන් ඩොලර් බිලියන 1 ඉක්මවා ගොස් ඇති චිත්රපට ගණන තුනක්.
ඒ ඩොලර් බිලියන 1.03 ක ආදායමක් උපයා ඇති ඩිස්නි හි සජීවී-ක්රියාදාම “Lilo & Stitch” (remake) සහ ඩොලර් බිලියන 2.2 කට වඩා ආදායමක් උපයා ඇති වසරේ විශාලතම චිත්රපටය ලෙස පවතින චීනයේ සජීවිකරණ “Ne Zha 2” චිත්රපටයයි.
ජූඩි හොප්ස් (Judy Hopps) නම් හාවා පොලිස් නිලධාරිනිය ලෙස සහ ඇගේ සහකරු වන නික් වයිල්ඩ් (Nick Wilde) නම් හිවලු සහකරුගේ නව වික්රමාන්විතයන් මෙවර චිත්රපටයට පාදක වී තිබෙන අතර ඩිස්නි හි 2016 මුල් ජනප්රිය චිත්රපටයේ අනුප්රාප්තිකයේ මිතුරන් දෙදෙනා වන ඔවුන් නැවත එක් කරයි.
කොවිඩ් වසංගතයෙන් පසු ලෝක සිනමා කර්මාන්තය තවමත් සම්පූර්ණයෙන් යථා තත්ත්වයට පත්ව නොමැති පසුබිමක, “Zootopia 2” ලැබූ මෙම වාර්තාගත ආදායම සිනමා ක්ෂේත්රයේ නව පිබිදීමක් ඇති කිරීමට සමත්ව ඇති බවයි විචාරකයෝ පවසන්නේ.
