ඉරානයේ උත්තරීතර නායක Ayatollah Ali Khamenei ජීවිතක්ෂයට පත්ව ඇති බව අමෙරිකානු ජනාධිපති Donald Trump සිය සමාජ මාධ්‍ය වේදිකාව වන Truth Social හරහා ප්‍රකාශ කර ඇති බව විදෙස් මාධ්‍ය වාර්තා කරනවා.

ට්‍රම්ප් සඳහන් කරන්නේ, අමෙරිකාව සහ Israel එක්ව ඉරානයට එල්ල කළ ගුවන් ප්‍රහාර මාලාවකින් අනතුරුව කමේනි මියගොස් ඇති බවයි.
ඔහු මෙම ක්‍රියාව “ඉතිහාසයේ සිදු වූ යුක්ති සහගතම ක්‍රියාවක්” ලෙස විස්තර කරමින්, එය ඉරාන ජනතාවටත් ලෝකවාසී සැමටත් ලැබුණු ජයග්‍රහණයක් බව අවධාරණය කර තිබෙනවා.

තවද, අමෙරිකානු ඔත්තු සේවා සහ නවීන ලුහුබැඳීමේ පද්ධති උපයෝගී කරගෙන, ඉතා සමීප සම්බන්ධතාවයකින් මෙහෙයුම දියත් කළ බවත්, ප්‍රහාරයෙන් ගැලවීමට කිසිදු අවස්ථාවක් නොතිබූ බවත් ඔහු ප්‍රකාශ කර තිබෙනවා.

කෙසේ වෙතත්, මේ වනතෙක් Iran රජය විසින් මෙම පුවත නිල වශයෙන් තහවුරු කර නොමැත.
ඉරාන විදේශ අමාත්‍යාංශයේ ප්‍රකාශකයෙකු උපුටා දක්වමින් ඇතැම් මාධ්‍ය වාර්තා කළේ, උත්තරීතර නායකයා ආරක්ෂිතව සිටින බවත්, ට්‍රම්ප්ගේ ප්‍රකාශය “මානසික යුද්ධයක” කොටසක් බවයි.

මෙම ප්‍රකාශයත් සමඟ ජාත්‍යන්තර දේශපාලන වේදිකාව උණුසුම් වී ඇති අතර, මධ්‍යපෙරදිග කලාපයේ ආරක්ෂක තත්ත්වය පිළිබඳ ගැඹුරු අවධානයක් යොමු වී තිබෙනවා.