තමා සම්බන්ධයෙන් සමාජ මාධ්ය ඔස්සේ සිදුකරන ද්වේශ සහගත සහ අසත්ය ප්රකාශය සම්බන්ධයෙන් විමර්ශනය කිරීම සඳහා අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත්කළ බව මහජන ආරක්ෂක නියෝජ්ය අමාත්ය සුනිල් වටගල මහතා පවසනවා.
අදාළ ප්රකාශය නිර්මාණය කළ හා සමාජ මාධ්ය හරහා එය ප්රචාරය කළ පාර්ශ්වයන්ට එරෙහිව සිවිල් හා අපරාධ නීතීය යටතේ නඩු පැවරීමට කටයුතු කරන බවයි ඔහු පෙන්වා දෙන්නේ.
කොළඹ ප්රදේශයේ නිවාස සංකීර්ණයක නිවසක් මහජන ආරක්ෂක නියෝජ්ය අමාත්ය සුනිල් වටගල මහතා මිලදීගෙන ඇති බවට මේ දිනවල සමාජ මාධ්ය ඔස්සේ ප්රචාරයක් සිදුව තිබුණා.
අදාළ ප්රචාරය සම්බන්ධයෙන් සිය ෆේස්බුක් ගිණුමේ සටහනක් තබමින් නියෝජ්ය අමාත්යවරයා පෙන්වා දෙන්නේ එය සාවද්ය සහ අවලාදාත්මක ප්රචාරයක් බවයි.
එම ප්රචාරයේ කිසිදු සත්යතාවක් නොමැති අතර පක්ෂය ද, මහජනතාව ද තමා කෙරෙහි තබා ඇති විශ්වාසයට අබමල් රේණුවකින් හානියක් සිදුවන කටයුත්තක් තමා විසින් සිදුකර නොමැති බවයි ඔහු කියා සිටින්නේ.
නීතීඥවරයෙකු ලෙස ද, දේශපාලන ක්රියාකාරිකයෙකු ලෙසද අදහස් ප්රකාශ කිරීමේ නිදහස වෙනුවෙන් තමා අඛණ්ඩව කොන්දේසි විරහිතව පෙනී සිටින අතර, එම නිදහස දුෂ්ඨ ලෙස අවභාවිතා කිරීම, එය දිනාගැනීමට අනේකවිධ කැපකිරීම් සිදුකළ සියලු ශ්රේෂ්ඨ මිනිසුන්ට කෙරෙන අවමානයක් බවද වටගල මහතා පෙන්වා දෙනවා.
නියෝජ්ය අමාත්යවරයා සිය ෆේස්බුක් සටහනින් වැඩිදුරටත් දැනුම් දී ඇත්තේ අදාළ ද්වේශ සහගත සහ අසත්ය ප්රචාරය සම්බන්ධයෙන් හඳුනාගනු ලබන පාර්ශ්වයන්ට එරෙහිව සිවිල් නීතිය යටතේ වන්දි අයකර ගැනීමට කටයුතු කරන බවයි.
