මුල් ළමා විය සංවර්ධනය සහ රැකවරණය වෙනුවෙන් රජය පියවරයන් රැසක් ගෙන ඇති බව කාන්තා සහ ළමා කටයුතු අමාත්‍ය සරෝජා සාවිත්‍රි පෝල්රාජ් මහත්මිය පවසනවා.

ඇය මේ බව කියා සිටියේ ස්පාඤ්ඤයේ මැඩ්රිඩ් නුවර පැවැත්වෙන “Global Caregiver Forum 2026” හි “අනාගත දැක්ම සහ ඉදිරි පියවර” යන මැයෙන් පැවති සමාප්ති සැසිය අමතමින්.

රජයේ ප්‍රතිපත්ති ප්‍රකාශය තුළ “සුරක්ෂිත ළමා ලෝකයක් – නිර්මාණශීලී අනාගත පරපුරක්” යන දරුවන් උදෙසා වන දැක්ම යටතේ මෙම පියවර ගෙන ඇති බවයි ළමා කටයුතු අමාත්‍යවරිය සඳහන් කළේ.

ඒ අනුව මුල් ළමාවිය දරුවන් ඉලක්ක කරගනිමින් හඳුන්වා දුන් ළමා සෞඛ්‍ය ප්‍රවර්ධනය සඳහා වූ “Step – Up” සන්නිවේදන වැඩසටහන, 2027 වන විට දිවයිනේ සියලුම පෙරපාසල් සඳහා හඳුන්වා දෙන පොදු විෂය මාලාව සහ ගුරුවරුන් 19,000කට ලබාදෙන විධිමත් පුහුණුව, මුල් ළමාවිය රැකවරණය සහ සංවර්ධනය පිළිබඳ ජාතික බහු ආංශික උපාය මාර්ගික ක්‍රියාකාරී සැළැස්ම (2025 – 2029), ඔටිසම් ඇතුළු ස්නායු ආබාධ සහිත දරුවන් වෙනුවෙන් පළාත් සහ දිස්ත්‍රික් මට්ටමෙන් ක්‍රියාත්මක කරන පස් අවුරුදු වැඩසටහන වැනි ක්‍රියාමාර්ග අමාත්‍යවරිය විසින් මෙහිදී එම සැසියේදී දැනුවත් කර තිබෙනවා.

මීට අමතරව අමාත්‍යවරිය මෙහිදී පෙන්වා දෙනු ලැබුවේ ශ්‍රී ලංකාව තුළ රැකවරණය සලසන්නා යනු “සහායකයෙකු” පමණක් නොව සහතික ලත් වෘත්තිකයෙකු බවට පත් කිරීම බවයි.

එමෙන්ම ලෝකයේ සාර්ථක අත්දැකීම් සිය ප්‍රතිපත්තිවලට එක් කරගනිමින් ශ්‍රී ලංකාවේ සෑම දරුවෙකුටම සහ රැකවරණ සලසන්නෙකුටම සුරක්ෂිත, සමෘද්ධිමත් අනාගතයක් උදා කිරීම රජයේ වැඩපිළිවෙළ බවයි අමාත්‍යවරිය මෙම සමුළුවේදී අවධාරණය කළේ.

එසේම පසුගියදා ඇතිවූ දිට්වා සුළි කුණාටුවෙන් පීඩාවට පත් වූ ජනතාව වෙනුවෙන් මෙරට ජනතාව පෙන්වූ මානුෂීය රැකවරණය පිළිබඳවත්, රැකවරණය යනු පුද්ගලික බරක් නොව, එය රාජ්‍යයක සහ සමාජයක සාමූහික වගකීමක් බවත් අමාත්‍යවරිය මෙහිදී වැඩිදුරටත් පැවසුවා.