නොරොච්චෝලේ ගල්අඟුරු විදුලි බලාගාරය සඳහා ගල්අඟුරු මෙට්රික් ටොන් ලක්ෂ 3ක ප්රමාණයක් හදිසි ලෙස මිලදී ගැනීමට ලංකා ගල්අඟුරු සමාගම විසින් ටෙන්ඩර් කැඳවා තිබේ.
ඊට අදාළ නිල දැන්වීම සමාගමේ නිල වෙබ් අඩවියේ පළ කර ඇති අතර, 2026 වසරේ මාර්තු සිට අප්රේල් දක්වා කාලසීමාව සඳහා අවශ්ය ගල්අඟුරු තොගය හදිසි ප්රසම්පාදන ක්රියාවලියක් යටතේ මිලදී ගැනීමට සැලසුම් කර ඇති බව එහි සඳහන් වේ.
මෙම දැන්වීම සමාගමේ නිල වෙබ් අඩවියේ පළ කර ඇත්තේ පෙබරවාරි 25 වනදා වන අතර, ඒ අනුව නොරොච්චෝලේ ගල්අඟුරු බලාගාරයේ විදුලි උත්පාදනය අඛණ්ඩව පවත්වාගෙන යාම සඳහා අවශ්ය ගල්අඟුරු සැපයුම සහතික කිරීම මෙහි ප්රධාන අරමුණ බව සඳහන් වෙයි.
විශේෂයෙන්ම, ප්රමිතියෙන් තොර ගල්අඟුරු මෙරටට ආනයනය කිරීම සම්බන්ධයෙන් පසුගිය කාලයේ රට තුළ ආන්දෝලනාත්මක තත්ත්වයක් මතු වූ පසුබිමක මෙම හදිසි මිලදී ගැනීමේ තීරණය ප්රකාශයට පත් කර තිබීම ද අවධානයට ලක්ව තිබේ.
අදාළ ටෙන්ඩර් ක්රියාවලිය හරහා 2026 මාර්තු – අප්රේල් කාලසීමාව තුළ භාවිතා කිරීම සඳහා ගල්අඟුරු මෙට්රික් ටොන් ලක්ෂ 3ක ප්රමාණයක් මිලදී ගැනීමට අපේක්ෂා කරන අතර, ඒ සඳහා අවශ්ය ප්රසම්පාදන කටයුතු ඉදිරියේදී සිදු කිරීමට නියමිතය.
නොරොච්චෝලේ බලාගාරය ශ්රී ලංකාවේ ප්රධාන විදුලි උත්පාදන මධ්යස්ථානයක් වන අතර, එහි ක්රියාකාරීත්වය රටේ සමස්ත විදුලි සැපයුමට සැලකිය යුතු ලෙස බලපාන බව බලශක්ති ක්ෂේත්ර විශ්ලේෂකයින් පෙන්වා දෙති.
