ඉදිරි සංචාරක සමය ඉලක්ක කර ගනිමින් සංචාරකයන්ගේ පහසුකම් නැංවීමට රජය වැඩසටහන් රැසක් සැලසුම් කර ඇති බව ජනාධිපති මාධ්ය අංශය පවසනවා.
සංචාරක කර්මාන්තයේ ප්රවර්ධනයට අවශ්ය කඩිනම් තීන්දු තීරණ ගැනීම සඳහා ජනාධිපති අනුර කුමාර දිසානායක මහතා විසින් පත් කරන ලද විශේෂ කාර්ය සාධක බළකාය දෙවන වරට ඊයේ (14) ජනාධිපති කාර්යාලයේදී රැස් වූ අවස්ථාවේ දීයි මේ පිළිබඳ පුළුල් ලෙස සාකච්ඡා කෙරුණේ.
ඒ අනුව මෙහිදී විශේෂ අවධානය යොමු වූයේ සංචාරකයන්ට වීසා ලබාගැනීම පහසු කිරීම සහ විද්යුත් සංචාරක අවසර පත්ර (ETA) ලබාදීමට අදාළ කරුණු පිළිබඳයි.
එමෙන්ම, සංචාරකයන් මෙරටට පැමිණිමේදී ගුවන්තොටුපොළේ දී ඇති වන තදබදය අවම කර ගැනීම සඳහා කවුන්ටර වැඩි කිරීම සහ සංචාරකයන් විවිධ ස්ථාන නැරඹීමට යාමේදී ප්රවේශ පත්ර ලබා ගත යුතු ස්ථානවලදී එම ප්රවේශ පත්ර Online ක්රමයට ලබා ගැනීමට පහසුකම් සැලසීම ආදිය පිළිබඳවද සාකච්ඡා කරනු ලැබුවා.
එමෙන්ම සංචාරකයන් සහ සංචාරක ක්ෂේත්රයේ පාර්ශ්වකරුවන් මුහුණ පා ඇති ගැටලු සම්බන්ධයෙන්ද මෙහිදී අවධානය යොමු වූ බවයි ජනාධිපති මාධ්ය අංශය පැවසුවේ.
විදේශ කටයුතු, විදේශ රැකියා සහ සංචාරක අමාත්ය විජිත හේරත්, සංචාරක නියෝජ්ය අමාත්ය රුවන් රණසිංහ, ජනාධිපති ලේකම් ආචාර්ය නන්දික සනත් කුමානායක, විදේශ කටයුතු, විදේශ රැකියා සහ සංචාරක අමාත්යාංශයේ ලේකම් අරුණි රණරාජා යන මහත්ම මහත්මීන් සහ සංචාරක ක්ෂේත්රයට අදාළ ආයතනවල ප්රධානීන්ද, සංචාරක ක්ෂේත්රය නියෝජනය කරමින් ජෝන් කීල්ස් හෝල්ඩිංග්ස්හි ප්රධාන විධායක නිලධාරී ක්රිෂාන් බාලේන්ද්ර, EKHO හෝටෙල්ස් සහ රිසෝට්ස් හි උප සභාපති නිහාල් මුහන්දිරම් යන මහත්වරු ඇතුළු නියෝජිතයන් පිරිසක් මෙම අවස්ථාවට එක්ව සිටියා.
