‘දිට්වා’ සුළි කුණාටුව හේතුවෙන් දෙමාපියන් අහිමිව අනාරක්ෂිතභාවයට පත් වූ දරුවන් පිළිබඳ විවිධ පුද්ගලයින් විසින් එම දරුවන් රැකබලා ගැනීම හා ඔවුන්ගේ ඉදිරි ජීවන කටයුතු සාර්ථක කර ගැනීම සඳහා දරුවන් ඔවුන් භාරයට පත් කරන ලෙස ඉල්ලීම් කරමින් විවිධ දුරකථන අංක පළකරමින් ඒවාට දරුවන්ගේ තොරතුරු ලබා දෙන ලෙස ඉල්ලා සමාජ මාධ්ය ඔස්සේ මේ දිනවල පණිවුඩ සංසරණය වන බවට ශ්රී ලංකා පොලීසියට නිරීක්ෂණය වී තිබෙනවා.
මෙලෙස සමාජ මාධ්ය ඔස්සේ දුරකථන අංක පළ කරනු ලබන ඇතැම් නොහඳුනන පුද්ගලයින් විසින් අනාරක්ෂිතභාවයට පත් වු දරුවන් පිළිබඳ තොරතුරු ඉල්ලා ලබා ගැනීමෙන් පසු එම දරුවන්ගේ භාරකරුවන් ලෙස පෙනී සිටිමින් සහන සපයන මුවාවෙන් විවිධ නීතිවිරෝධී කටයුතු සඳහා යොමු කර ගැනීමේ ප්රවණතාවයක් ඇති බවයි පොලීසිය නිවේදනය කරන්නේ.
එසේම දරුවන් ලිංගික අපයෝජන, ළමා අපචාර, මෙහෙකාර සේවයේ යෙදවීම හා ළමුන් කෲරත්වයට පත්කිරීම් ඇතුළු අපරාධ සඳහා මෙම අනාරක්ෂිත දරුවන් ලක්වීමද සිදුවිය හැකි බව පොලීසිය සඳහන් කරයි.
එම දරුවන් නිසි භාරකාරත්වයට ගෙන ඔවුන් සුරක්ෂිතව පෝෂණය කිරීමේ හෝ දරුකමට හදාවඩා ගැනීමට යම් තැනැත්තෙකුට සද්භාවයෙන්ම අවශ්යතාවයක් තිබේනම් ශ්රී ලංකාවේ බලපැවැත්වෙන සාමාන්ය පොදු නීතිය යටතේ දිසා අධිකරණයේ නඩු කටයුත්තක් ආරම්භ කිරීමෙන් පසු එම කටයුතු ඉටුකර ගත හැකි වනු ඇතැයි ද පොලීසිය නිකුත් කළ නිවේදනයේ දැක්වෙනවා.
ඒ අනුව, සමාජ මාධ්ය ඔස්සේ මෙලෙස දුරකථන අංක පළ කරමින්, අනාරක්ෂිත භාවයට පත්වූ දරුවන් පිළිබඳ විමසීම් කරන නොහඳුනන තැනැත්තන් වෙත එම දරුවන්ගේ තොරතුරු ලබා දීමෙන් වැළකී සිටින ලෙසයි ශ්රී ලංකා පොලීසිය ඉල්ලා සිටින්නේ.
එමෙන්ම පොලිසිය වැඩිදුරටත් මහජනතාවට දැනුම් දෙන්නේ එවැනි දෙමව්පියන් අහිමිව, අනාරක්ෂිත තත්ත්වයට පත් දරුවන් සම්බන්ධව යම් අයෙකුට සහනයක් ලබා ගැනීමට අවශ්ය අවස්ථාවකදී ළමා රක්ෂණ අධිකාරිය හෝ ළමා හා කාන්තා අපයෝජන නිවාරණ හා විමර්ශන කාර්යංශය දැනුවත් කරන ලෙසයි.
