මත්ද්රව්ය භාවිත කර රිය ධාවනයේ යෙදෙන මගී බස් රථ රියදුරන් සහ රිය සහායකයින් හඳුනා ගැනීම සඳහා පසුගිය 21 වැනිදා ආරම්භ කළ ජංගම රසායනාගාරය මගින් පරීක්ෂා කළ බස් රියදුරන් 56 දෙනෙකුගෙන් 10 දෙනෙකුම විෂ මත්ද්රව්ය භාවිත කර ඇතැයි හෙළිවූ බව ප්රවාහන හා මහාමාර්ග නියෝජ්ය අමාත්ය වෛද්ය ප්රසන්න ගුණසේන මහතා පවසනවා.
පසුගිය 21 වැනිදා මෙම ජංගම රසායනාගාර පරීක්ෂාව ආරම්භ වූයේ කොළඹ බැස්ටියන් මාවත පුද්ගලික බස් නැවතුම්පොළේදීයි.
එහිදී අහඹු ලෙස තෝරාගත් රියදුරන් 56 දෙනා අතුරින් 10 දෙනෙකුයි මෙලෙස මත්ද්රව්ය භාවිත කර ඇති බවට හෙළිව ඇත්තේ.
මෙලෙස හඳුනාගත් බස් රියදුරන් 10 දෙනා අයිස්, හෙරොයින්, ගංජා යන විෂ මත්ද්රව්ය භාවිත කර ඇති බවට මූලික මුත්රා සාම්පළ පරීක්ෂාවේදී තහවුරු වූ බවත්, ඒ අනුව අදාළ රියදුරන් ඉදිරි නෛතික කටයුතු සඳහා යොමු කළ බවත් අමාත්යවරයා ප්රකාශ කළා.
එමෙන්ම ප්රසන්න ගුණසේන මහතා ප්රකාශ කළේ අහඹු ලෙස තෝරා ගෙන පරීක්ෂා කළ මෙම මෙහෙයුම මගින් බස් රථ රියදුරන් 10 දෙනෙකු විෂ මත්ද්රව්ය භාවිත කර ඇතැයි හෙළි වීම සංකීර්ණ තත්ත්වයක් බවයි.
තවද මෙම වැඩපිළිවෙළ ක්රියාත්මක කිරීමේදී ඇතැම් රියදුරන් විවිධ සන්නිවේදන ක්රමවේද භාවිත කරමින් මාර්ග මගහැර පරීක්ෂණවලට භාජනය වීමෙන් වැළකීමට උත්සාහ දැරීම නිරීක්ෂණය වූ බවත්, ඒ හේතුවෙන් බස් හිමියන් සහ ජනතාව වැඩි අවධානයක් ලබා දෙමින් මෙම ජාතික වැඩපිළිවෙළ සාර්ථක කිරීමට දායකත්වය ලබා දිය යුතු බවයි ඔහු සඳහන් කළේ.
එමෙන්ම බස්නාහිර පළාත තුළ ආරම්භ කළ මෙම පරීක්ෂා කිරීම ඉදිරියේදී දිවයින පුරා පූර්ව දැනුම්දීමකින් තොරව සිදුකරන බවත් සඳහන් කළ නියෝජ්ය අමාත්යවරයා වැඩිදුරටත් කියා සිටියේ නිරන්තරයෙන් මෙම වැටලීම් සිදුකරන බවත් වැටලීම් ප්රමාණාත්මකව වැඩි කිරීමටද කටයුතු කරන බවයි.
