වෙන්නප්පුව පොලීසිය ආසන්නයේ පිහිටි වැව පාර ප්‍රදේශයේ දී සිදුකළ වෙඩි තැබීම සම්බන්ධයෙන් තවත් සැකකරුවන් දෙදෙනෙකු අත්අඩංගුවට ගෙන තිබෙනවා.

මෙලෙස අත්අඩංගුවට ගෙන ඇත්තේ වයස අවුරුදු 26ත් 29ත් අතර පසුවන පුද්ගලයින් දෙදෙනෙකු බවයි පොලිසීය සඳහන් කළේ.

ඔවුන් දෙදෙනා අද (01) මාරවිල මහේස්ත්‍රාත් අධිකරණයට ඉදිරිපත් කිරීමට නියමිතයි.

මෙම වෙඩි තැබීම සම්බන්ධයෙන් ඊයේ දිනයේ දී ද රිවෝල්වර් වර්ගයේ ගිනි අවියක් සමඟ සැකකරුවෙකු වෙන්නප්පුව පොලිසීය විසින් අත්අඩංගුවට ගෙන තිබුණා.

ඊයේ පෙරවරු 10.30ට පමණ මෙම වෙඩි තැබීම සිදුව ඇත්තේ වෙන්නප්පුව පොලීසිය ආසන්නයේ පිහිටි වැව පාර ප්‍රදේශයේ දීයි.

මොටර් රථයකින් පැමිණි පිරිසක් විසින් යතුරුපැදියේ ගමන් ගත් පුද්ගලයෙකු අනතුරකට ලක් කර පසුව යතුරුපැදියේ පැමිණි දෙදෙනාට තියුණු ආයුධයකින් පහරදී වෙඩි තබා තිබුණා.

සිද්ධියෙන් යතුරුපැදියේ පැමිණි එක් අයෙකු තුවාල ලබා පලා ගොස් ඇති අතර අනෙක් පුද්ගලයා වෙඩි වැදීමෙන් ජීවිතක්ෂයට පත්ව ඇති බවයි පොලිසිය පැවසුවේ.

මෙම වෙඩි තැබීම සිදුව තිබුණේ යතුරුපදියෙන් පැමිණි දෙදෙනාගෙන් මිය ගිය තැනැත්තා මහාධිකරණයේ පවතින නඩුවකට අදාළව වෙන්නප්පුව පොලීසියේ අත්සන් කිරීමට පැමිණ ආපසු යමින් සිටි අවස්ථාවේ දීයි.

2025 සැප්තැම්බර් මස 09 වැනි දින මිය ගිය පුද්ගලයාගේ නඩුව සම්බන්ධව අධිකරණ තීන්දුව ලැබීමට නියමිතව තිබූ බවද පොලීසිය වැඩිදුරටත් ප්‍රකාශ කළා.