හිටපු ජනාධිපති රනිල් වික්රමසිංහ මහතාව තවදුරටත් දැඩි සත්කාර ඒකකයේ වෛද්ය නිරීක්ෂණය මත තබාගත යුතු බවට වන නිර්දේශ හේතුවෙන් බොහෝදුරට ඔහු අද (26) අධිකරණයට ඉදිරිපත් කිරීම නොහැකිවනු ඇතැයි බන්ධනාගාර මාධ්ය ප්රකාශක ජගත් වීරසිංහ මහතා සඳහන් කරනවා.
ZOOM තාක්ෂණය ඔස්සේ හෝ රනිල් වික්රමසිංහ මහතාව නීති කෘත්ය සඳහා ඉදිරිපත් කරන ලෙසට මහෙස්ත්රාත්වරිය නියෝග කළ හොත් ඊට අවශ්ය කටයුතු සම්පාදනය කළ හැකි බවයි ඒ මහතා වැඩිදුරටත් සඳහන් කළේ.
රාජ්ය මුදල් අවභාවිත කිරීමේ සිද්ධියකට අදාළව පොදු දේපළ පනත යටතේ වන චෝදනා මත අපරාධ පරීක්ෂණ දෙපාර්තමේන්තුව මඟින් අත්අඩංගුවට ගත් හිටපු ජනාධිපති රනිල් වික්රමසිංහ මහතාට එරෙහි නඩුව අද කොටුව මහෙස්ත්රාත් අධිකරණය හමුවේ යළි කැඳවීමට නියමිතයි.
සිද්ධියට අදාළව පසුගිය 22 වෙනිදා අත්අඩංගුවට ගත් හිටපු ජනාධිපතිවරයා අද දිනය දක්වා රක්ෂිත බන්ධනාගාර ගත කිරීමටයි අධිකරණය නියෝග කළේ.
ඒ මහතාගේ සෞඛ්ය තත්ත්වය සැලකිල්ලට ගනිමින් එදින ඔහු බන්ධනාගාර රෝහලට ඇතුළත් කෙරුණු අතර වෛද්ය නිර්දේශ මත ඊට පසුදින ඔහු කොළඹ ජාතික රෝහලේ දැඩි සත්කාර ඒකකයට ඇතුළත් කෙරුණා.
ඒ අනුව මේ වන විට හිටපු ජනාධිපතිවරයා කොළඹ ජාතික රෝහලේ දැඩි සත්කාර ඒකකයේ ප්රතිකාර ලබන අතර ඔහු අධිකරණය හමුවට ඉදිරිපත් කළ යුතු වන්නේ අද දිනයේයි.
කෙසේවෙතත් හිටපු ජනාධිපතිවරයාගේ සෞඛ්ය තත්ත්වය සැලකිල්ලට ගෙන විශේෂඥ වෛද්යවරුන් 5 දෙනෙකුගෙන් යුත් කමිටුවක් මඟින් ඔහු අධීක්ෂණය සිදුකරන අතර අද දිනයේ අධිකරණයට ඉදිරිපත් කරනවාද? නැද්ද? යන්න එම කමිටුව විසින් නිර්දේශ ඉදිරිපත් කරන බව වාර්තා වනවා.
බොහෝදුරට රනිල්ට අද අධිකරණයට ඉදිරිපත් වීමට නොහැකිවෙයි – බන්ධනාගාර මාධ්ය ප්රකාශක
Shares: