ශ්රී ලංකාව සහ ඉන්දියාව අතර පවතින ද්විපාර්ශ්වික ආරක්ෂක සබඳතා තවදුරටත් ශක්තිමත් කරමින්, ඉන්දීය රජය විසින් මෙරට යුද්ධ හමුදාව වෙත ඇමෙරිකානු ඩොලර් මිලියන 5කට අධික වටිනාකමකින් යුත් හමුදා සහ වෛද්ය උපකරණ තොගයක් පරිත්යාග කර තිබේ.
මෙම උපකරණ නිල වශයෙන් භාරදීමේ උත්සවය ඊයේ (16) ශ්රී ජයවර්ධනපුර කෝට්ටේ පිහිටි ආරක්ෂක මූලස්ථාන සංකීර්ණයේ යුද්ධ හමුදා මූලස්ථානයේදී උත්කර්ෂවත් අන්දමින් පැවැත්විණි.
පරිත්යාගයේ අන්තර්ගතය
ඉන්දීය රජයේ විශේෂ ආධාර වැඩසටහන යටතේ පිරිනැමුණු මෙම පරිත්යාගයට පහත දෑ ඇතුළත් වේ:
නවීන හමුදා තාක්ෂණික උපකරණ තොගයක්.
හදිසි අනතුරු හා කම්පන සත්කාරක පද්ධතියක් (Accident & Trauma Care System).
මෙහිදී මෙරට ඉන්දීය මහ කොමසාරිස් සන්තෝෂ් ජා (Santosh Jha) මහතා විසින් ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්රාමික) මහතා වෙත මෙම උපකරණ තොගය නිල වශයෙන් භාර දුන් අතර, එම අවස්ථාවට යුද්ධ හමුදාපති ලුතිනන් ජෙනරල් ලසන්ත රොද්රිගු මහතා ද එක්ව සිටියේය.
එක්සත් ජාතීන්ගේ සාමසාධක බලකායටත් උපකරණ
හයිටි රාජ්යයේ එක්සත් ජාතීන්ගේ සාමසාධක මෙහෙයුම්වල නිරත ශ්රී ලංකා යුද්ධ හමුදා සාමාජිකයින් වෙනුවෙන් ඉන්දීය යුද්ධ හමුදාවෙන් ලැබුණු විශේෂ උපකරණ තොගයක් ද මීට ඇතුළත් වේ. එම උපකරණ තොගය පසුගිය ජූනි 10 සිට 13 දක්වා කොළඹ වරායට පැමිණි ඉන්දීය නාවික හමුදාවට අයත් ‘INS Sharda’ නෞකාව මඟින් දිවයිනට රැගෙනවිත් තිබේ.
ද්විපාර්ශ්වික සබඳතා පුළුල් වෙයි
මෙහිදී අදහස් දැක්වූ ඉන්දීය මහ කොමසාරිස් සන්තෝෂ් ජා මහතා පෙන්වා දුන්නේ දෙරට අතර ආරක්ෂක සහයෝගීතාව දැන් හුදු පුහුණු කිරීම් සහ මානුෂීය ආධාරවලින් ඔබ්බට ගොස්, ආරක්ෂක හැකියාවන් ඉහළ නැංවීම සහ යටිතල පහසුකම් සංවර්ධනය දක්වා පුළුල් වී ඇති බවයි.
ආරක්ෂක ලේකම්වරයා ද මෙහිදී අදහස් දක්වමින් කියා සිටියේ ශ්රී ලංකාවේ සහ ඉන්දියාවේ සන්නද්ධ හමුදාවන් වසර ගණනාවක සිට ඉතා සමීප සහ වෘත්තීයමය ස්ථාවර සබඳතාවක් පවත්වාගෙන යන බවයි.
✖️ YouTube: https://www.youtube.com/@lankahitnews
✖️ Facebook: https://www.facebook.com/officiallankahitnews
✖️ TikTok: https://www.tiktok.com/@lankahitnewsofficial
✖️ Twitter/X: https://x.com/HitNewsLanka
✖️ Website: https://www.lankahitnews.com
ඔබේ ප්රදේශයේ පුවත් අපට එවන්න:
WhatsApp: 072 746 4185
Email: [email protected]
නවතම පුවත් ඉක්මනින්ම ලබාගන්න Lanka Hit News Page එක Follow කරලා තියාගන්න.
